BAHRUTENG

BAHRUTENG NU JADI BALUWENG
[asmarandana]

ngadenge basa keur leutik
sanajan dedenge tarak
kolot anu eukeur ngobrol
direumbeuy kecap injeuman
nyarita soal waragad
harita mah rada bingung
na naon atuh hartina

sihoreng teh eta geuning
rarancang hiji udagan
anu disebut bahruteng
nyurupkeun dina kahayang
saluyu jeung kamampuhan
ngitung duit reujeung waktu
ngatur nu rek dipilampah

cenah aslina 'begrooting'
asalna basa walanda
basa inggrisna mah 'budget'
nu dimaksud teh anggaran
ngitung beya reujeung program
tangtu bae kudu nyurup
jeung 'dana' tur kamampuhan

--
anyar gawe  milu mikir
disangka sugan teh gampang
tapi geuning hararese
jeung rea alang ujurna
da beda jeung teorina
heug kudu nyambung nyarungsum
tapi  loba sesekelan

bahruteng beres diketik
jumlahna teh gede pisan
dirapatkeun ku inohong
usulan teh dicoretan
tapi nimbulkeun  masalah
rarancang jadi teu nyambung
kapaksa kudu dibongkar

waktuna teh ngan saeutik
sedengkeun programna rea
tapi hayang asup kabeh
supaya di kantor pusat
teu rea anu di sunat
angggaran jadi teu puguh
angkana digitik rata

anggaran turun teh leutik
asana moal nyukupan
lamun dibandingkeun 'target'
tapi dalah dikumaha
jalankeun saaya aya
sakapeung sok pabaliut
hese ngokolakeunana

beh dieuna mah make 'trick'
nyieun program teh sing rea
supaya henteu dicoret
kuring rek nelepon heula
ka batur anu di pusat
malahmandar lulus banglus
anggaran disatujuan

dina jaman anu werit
katambah goreng lingkungan
urang teh jadi kadempet
itu salah ieu salah
nu bener can tangtu meunang
mun salah diincer tangtu
hate urang gegebegan

resiko jadi pamingpin
ngahareupan pasimpangan
mun salah pilih jeung mengkol
'kapeka' bageanana
unggah ka bale watangan
karir urang jadi ancur
salian meunang wiwirang

tapi lamun urang tigin
nyekel kana bebeneran
rancingeus rea kadaek
waspada permana tingal
asana mah moal gagal
mun nasibna  henteu untung
rugi ge moal kacida

---
skmi 10102011

Undangan_05

RUKUN TETANGGA 07 RUKUN WARGA 15

KELURAHAN BEJI KECAMATAN BEJI

KOTA DEPOK

Jl. Nangka Gg. Pepaya No. 31 082112478932

No                    : 05/UND/X/2011

Perihal              : Undangan

Lampiran           : -

Kepada Yth:

Warga Rt. 07 / 15

Di tempat

Dengan Hormat

Puji syukur kita panjatkan ke hadirat Tuhan yang maha esa. Semoga kita semua diberi kelancaran dalam melakukan aktifitas sehari-hari.

Pada musyawarah yang diadakan di Mushola Nurul Iman pada tanggal 17 Oktober 2011 yang lalu, disepakati beberapa hal, diantaranya tentang kepanitiaan Qurban 1432 H, kepengurusan arisan periode yang baru, dan kerja bakti lingkungan.

Dalam hal ini pengurus Rt. 07 / 15 mengundang Bapak-bapak warga sekalin untuk hadir pada kerja bakti yang akan dilaksanakan:

Hari / Tanggal                : Minggu / 23 Oktober 2011

Waktu                           : Pkl. 08.00 - selesai

Tempat                         : Lingkungan Rt. 07/15

Demikian surat undangan ini kami sampaikan, semoga kita semua diberi kemudahan untuk menghadirinya. Dan atas perhatiannya kami haturkan banyak terima kasih.

Hormat Kami

Ketua Rt.07/15

Denis Iskandar

Emut ka Mama Karom

    [Sanès Pupuh]

Sok emut ka mama karom

ngawulang matematika

kadang ngawulang PMP

da gening kirang guruna

maklum kampung bau lisung

sukuna gunung galunggung

Waktos ngawulang PMP

saur mama urang dikte

bijilkeun buku jeung pulpen

mimiti baris kahiji

celengkeung tèh tulis GARU

barudak kadon olohok

celengkleung si asep dani

can kungsi kotrèt na buku

hapunten mama yeuh abdi

teu ngartos GARU tèh naon

bari gagaro mastaka

luak lieuk ka baturna

cakakak mama gumujeng

bangun nu ngeunah kacida

bari celengkeung nyarios

pan GARU tèh Garis baRU

sok geuwat gera narulis

bisi kaburu bèl mantèn

Pupuh Murangkalih

ADI KURING

[asmarandana]

abdi gaduh rai alit

matak resep lucu pisan

nangis mun tos hoyong bobo

suranyeh mun dioconan

resep kana cocooan

estuning matak kayungyun

ka abdi teh apet pisan

upami  pun adi nangis

ku ema sok diupahan

enggal geura sina nyonyo

jep repeh tur pogot pisan

pinareup teh digegelan

lajeng ku ema diayun

disangkeh dina aisan

pinter pisan ema abdi

tulaten ngurus putrana

mun enjing bayi dibedong

salirana diwedakan

saparantos disiraman

teu hilap teras dibalur

kayu putih ngahaneutan

diropea dipiasih

ditalingakeun emamna

adi teh beuki morontod

montok tur badanna sehat

arang kaserang panyawat

mun hereeng mung dibalur

ku bawang ge enggal damang

pun adi teh beuki lami

ngageungan tiasa mapah

tapi polahna sok oces

barang-barang sok diacak

atuh kamer paburantak

kuring katempuhan atuh

memeres eta rohangan

pami abdi nembe uih

ti sakola  pasisiang

pun adi mapag di panto

bari ngucap aa aa

teras  tanganna diangkat

kahayangna teh dipangku

kalahka jadi ogoan

mun abdi diajar ngaji

pun adi ge sok ngiringan

ngarebut tutunjuk nyere

nu ku kuring dicepengan

paranti ngaos al quran

nyere lesot kantun curuk

da kuring osok ngelehan

---

skmi 23092011

NYALINDUNG KA GELUNG

NANGGEUH KA NU JEGUD
[asmarandana]

lain ngan anyar kiwari
da eta mah ti baheula
geus lumrahna ti bareto
mun jajaka jalma susah
meunangkeun kolot jeung randa
bari si randana jegud
'nyalindung ka gelung' eta

ulah arek nyisikudi
sabab kitu dasar cinta
umur henteu rek ditenjo
randa henteu jadi soal
asal hate kabeh bagja
rymah tangga asal junun
layeut geugeut tur satia

komo lamun selebriti
randa ge da bisa midang
boga ngaran jeung populer
diuar-uar media
jadi bahan kacapangan
malah resep lamun gujrud
'ratingna' jadi nambahan

ngan kahade ati-ati
lamun ngawin hiji randa
idahna kudu geus beres
anjeun ulah lalawora
wani ngarumpak agama
engke orok pabaliut
nanyakeun saha bapana

teu dilarang arek kawin
beda umur henteu haram
jodo mah kudrat ti Alloh
manakitu ge nasibna
asal urang kudu taat
rumah tangga masing jucung
ulah jadi kaulinan

---
skmi-23092011

NU DIPIKANYAAH

ADI KURING
[asmarandana]

abdi gaduh rai alit
matak resep lucu pisan
nangis mun tos hoyong bobo
suranyeh mun dioconan
resep kana cocooan
estuning matak kayungyun
ka abdi teh apet pisan

upami  pun adi nangis
ku ema sok diupahan
enggal geura sina nyonyo
jep repeh tur pogot pisan
pinareup teh digegelan
lajeng ku ema diayun
disangkeh dina aisan

pinter pisan ema abdi
tulaten ngurus putrana
mun enjing bayi dibedong
salirana diwedakan
saparantos disiraman
teu hilap teras dibalur
kayu putih ngahaneutan

diropea dipiasih
ditalingakeun emamna
adi teh beuki morontod
montok tur badanna sehat
arang kaserang panyawat
mun hereeng mung dibalur
ku bawang ge enggal damang

pun adi teh beuki lami
ngageungan tiasa mapah
tapi polahna sok oces
barang-barang sok diacak
atuh kamer paburantak
kuring katempuhan atuh
memeres eta rohangan

pami abdi nembe uih
ti sakola  pasisiang
pun adi mapag di panto
bari ngucap aa aa
teras  tanganna diangkat
kahayangna teh dipangku
kalahka jadi ogoan

mun abdi diajar ngaji
pun adi ge sok ngiringan
ngarebut tutunjuk nyere
nu ku kuring dicepengan
paranti ngaos al quran
nyere lesot kantun curuk
da kuring osok ngelehan


---
skmi 23092011

HALODO

DANGDARAT DI LEMBUR
[maskumambang]

matak waas mun inget basa bihari
lembur  matak betah
walunganna curcor cai
tapi ayeuna ngoletrak

sihoreng teh gunung gundul jarang kai
da ditaluaran
diganti cabe saledri
atawa eurih tegalan

di longok teh geuningan sungapan cai
liangna saraat
ari nu sawareh deui
paralon jaradi talang

balukarna lembur kakurangan cai
sawah teh  balencar
balong ge saraat deui
nu aya ge bet peureuan

tatangkalan dahanna teh bet gararing
jadi ngarangrangan
kebon ge pinuh ku eurih
hawa lembur jadi panas

ceuk nu apal kudu direboisasi
pelakan ku tangkal
anu bisa nahan cai
nyerep lamun hujan datang

tapi naha nu datangna teh banjir
sawah kacaahan
lauk di balong paralid
mun halodo kalah gahgar

alesan mah cenah eta ganti 'musim'
tapi naha enya
lain sabab urang lali
kana kanyaah ka alam

---
skmi 22092011

PIWURUK

SABAR NANDANGAN KAHIRUPAN
[mijil]

dina hirup urang sing tarapti
waspada lalakon
teu gareuwah reujeung epes meer
sabar lamun keur meunang kasedih
hirup ati ati
teu ngalajur napsu

mun kiwari kabongbroy materi
tangtu teu maido
geus jamanna mana kitu oge
tapi inget kudu dikadali
ulah rek  ka nepi
dunya ngabelenggu

rea jalma anu teu areling
kaasup inohong
jalma cacah ge sarua wae
kabehna teh bet arasup bui
ditangkep pulisi
urang mah tong kitu

ulah sedih nanjan anjeun miskin
sing yakin ka Alloh
lamun sabar dibales tanwande
sabab engke dina poe ahir
tangtu bakal bukti
Alloh teu taradud

lamun anjeun beunghar luhung harti
kudu jadi conto
sukur ni'mat laku lampah soleh
ulah hawek komo bari medit
ulah 'buntut kasir'
bisi Alloh  bendu

---
skmi 22092011

Pasèa

Saenyana mah asa éra ngadongéng téh..

Tapi keun wé deuh..

Da meureun kabéh gé pasti ngalaman..

Tong boro salaki jeung pamajikan..

Awéwé jeung lalaki nu keur mangsana bobogohan..

Papada sobat dalit..

Pasti kungsi ngalaman nu ngaran paséa mah

Boh leutik boh gedé

Anu penting mah kumaha sikep urang..

Mun keur kaalaman ku diri sorangan..

Pan ceuk nu pinter mah,,,

“Ambil sisi baik dari setiap kejadian yang kita alami”

Pon kitu deui paséa..

Da gening aya nu beunang di ala tina paséa téh,,..

Bari uulah ari ngahaja-haja mah kétang

Kahiji…

Sok rada remen da bibi atawa mamang kuring

Ngadongéngkeun kalakuan si abah (aki)

Mun keur dicarekan ku si ema (nini)…

Kieu cenah…

Si abah mah, lamun keur dicarékan ku ema téh da tara ieuh némbal

Estuning ngeluk tungkul

Sugan sok sakecaaap…. Da taara

Atuda kacipta, kumaha céréwédna si ema

pan kuring gé ngalaman atuh diasuh ku ema mah

wa’as bari rada miripis téa

sowanten treble satakerna, bass na ampir pareum

cempréng…. Heuheu…

hapunten ema da kitu téh panginten ema mah kanggé kasaéan urang sadaya.

Mun geus rada leler téh si ema cacarios…

Abah mah mung sakieu…

“Atos ma nyarios téh?... pami teu acan mangga lajengkeun”

Atuh teu wudu… capétang deui waé eté si ema

Kacipta… hanyakal kuring mah teu kungsi nyaksian

Kadua…

Nu kaalaman ku kuring sorangan ieu mah

Basa kuring paséa jeung sakadang jikan

Bari rada nyonto kana kalakuan si Abah téa kuring téh

jempé teu ngomong sakecap-kecap acan

estuning heueuh heueuh bueuk wéé

Murudul téh lain wadul

Murubut sagala disebut téh nyaan

Teu sirikna dibudalkeun kabéh éta eusining haté

Ditalar téh nyaan teu ngéjah-ngéjah acan jigana

Sagala codéka kuring, kakurangan kuring, katugenah manéhna

Kabéh ditataan taya nu kaliwat

oOo

kuring jadi inget kana hiji papatah heubeul

“Tanyakanlah apa kekuranganmu pada musuhmu”

Da enya atuh…

Pan saharitaeun mah meureun jikan kuring téh keur jadi musuh

jadi kuring nyaho naon waé kakurangan kuring ka jikan..

naon waé ka tugenah jikan…

jadi  kuring nyaho palebah mana nu kudu dibebener  téh

da lamun seug ngahaja-haja mah sina nyebutan hiji-hiji

pan can puguh kedal…

Cooba mun saruana…

Nu itu ngawakwak, nu ieu némbal..

Moal teu jadi padungdung atuh

Kadéngé ku barudak

Kadéngé ku tatanga

Piring wéh ting kalayang

Gelas pru pré moal hanteu

Pan jadi riweuh kadituna

Matak kudu aya nu ngéléhan salahsahiji

Da meureun nu ngaran ngaran ngéléhan téh apan teu kudu éléh nya…

Ah kétang… étamah pangalaman kuring wéé

Can puguh sarua jeung nu séjén

Da kuring gé jauh kénéh ti ngaran bener mah

-sakitu-

Barudak mapay-mapay sawah ngajingjing sendal

Dedelewoan dina tengah kotakan

Dipisieup ku Galunggung

Disaksian ku papatong jeung cai ibun 

 Mapay-mapay galengan duka kamana nepina

 Mapay-mapay galengan duka kamana nyanghareup

Ngadaweung dina galengan, teu paduli jibrug jeung bobolokot

ALFATIHAH

BISMILLAHI_kalayan nyebat jenengan Alloh..

ARROHMANI_anu maha welas.. ARROHIMI_anu maha asih..

ALHAMDU_sagala puji..  LILLAHI_kagungan Alloh..

ROBBIL ALAMINA_anu mangèranan sakabèh alam..

ARROHMANI_anu maha welas.. ARROHIMI_anu maha asih..

MALIKI YAUMIDINI_anu ngarajaan dina poè kiyamah..

IYYAKA_ka Gusti wungkul.. NA’BUDU_ibadah abdi sadaya..

WA IYYAKA_sareng ka Gusti wungkul.. NASTAINU_nyuhunkeun pitulung abdi sadaya

IHDINA_muga Gusti nuduhkeun.. SIROTOL MUSTAQIM_kana jalan anu lempeng

SIROTHOLADZINA_nyaèta jalan jalma-jalma.. AN’AMTA_anu dipasihan nikmat.. ALAIHIM_maranèhan nana

GHOIRIL MAGHDUBI_sanès jalan anu dibenduan.. ALAIHIM_maranèhan nana

WALADDHOOLLIIN_sareng sanès jalan jalma-jalma anu salasar..

Beurang Ieu

Beurang ieu panonpoè teu pati morèrèt

Angin ngahiliwir lalaunan

Nebak awak saha waè nu keur kabeneran teu ngaub

Panon teu pati teuing kudu nyureng balas ku sèrab

Kuring ngalungsar dina galengan dijuru kotakan

Suku katuhu ngajogo luhureun galengan

Atuh dampal suku nu kènca  kakeueum kènèh dina kotakan

Leungeun katuhu kikiplik makè dudukuy

Leungeun kènca disampaykeun kana gagang pacul hareupeun

Bari dayagdag awak disarandèkeun kana tangkal peuteuy sèlong

Ngadagoan si nyai cenah keur dijalan ka dieukeun

Teu lila ronghèap si nyai bèh wètan

katingali ti kajauhan karèk norojol pulang tanjakan

panangan kènca ngèlèk boboko, nu katuhu ngajingjing kempis

lalaunan mapay galengan kotakan mang Samjali

bangun nu paureun èta si nyai

da ku enyana, pan galengan èta tèh can pati weweg

da karèk meunang mopokan poè kamari

inget kadinya… korèjat kuring gura giru hudang

tuluy mapag jungjunan nu karèk datang

bari ngagorowok… kadè nyaiiii… bilih geubiiisss

heup wè atuh di dinya antosan, akang kadinya nungtun nyai…

teu lila kuring duaan geus nepi ka palataran hareupeun saung di juru kotakan bèh kulon

ah teu banyat ka saung da rarasaan asa hayang nuluykeun hanca nu tadi

ngalungsar dina galengan bari ngajogo..

ngan ayeuna mah asa leuwih nikmat karasana

rèk teu kitu kumaha, pan ayeuna mah dibaturan ku si nyai atuh

nganteuran dahareun sapuratina.. teu poho dièmbohan ku gelenyuna.. nu sok matak hayang giru balik

ènggal nyi gera buka timbel tèh, akang tos teu kiat yeuh lapar… ceuk kuring

mangga kang… sabar atuh Akaang… tèmbal si nyai bari geuwat mukaan eusi boboko

ana gorèhèl bareng dibuka… eusina meni kumplit

timbel 2 guruntul dibungkus ku daun nu meni herang balas dileumpeuh

sayur waluh dicabe hèjoan karesep kuring

asin tawès menang ngagorèng garing, tapi teu nepi ka tutung

teu poho sambel tarasi meni ledok dina coet leutik.

Sok enggal akang, sakantenan sauran mang Mukti sina tuang di dieu sareng, pan ieu timbelna dua, nyai ngahaja ngagèhan kanggè mang Mukti.

Teu lila kuring ngagorowok nyalukan mang Mukti… nu keur anteng kènèh mopokan galeng palebah kokocoran belah kalèr… Maaaang… tuang heula maaang, ieu aya timbel kanggè emang candak si Nyai..

Teu kungsi lila mah derr wè kuring tiluan ngariung balakècrakan.

Emh asa ku nikmat keur kieu mah hirup tèh…

Teu inget awak luut lèèt kènèh kèsang, suku bobolokot kenek ku leutak

Nuhun Gusti, ieu tèh da pastina ogè sanes ti sasaha

Istuning pamaparinan ti Gusti… ALHAMDULILLAH

-cag-

Surat ti minantu

[Bimbo]

Abdi jangji dina ati
Ka mitoha rèk gumati
Rek asa ka indung bapa
Moal lirèn barang pènta

Abdi jangji dina ati
Mitoha kolot abdi
Ka mitoha rèk nyalindung
Nyuhunkeun modal keur nyandung

Aduh bapa aduh ibu
Mitoha abdi saèstu
Ibu bapa mugi ihlas
unggal poè ngirim beas

aduh ibu aduh bapa
ka minantu ulah tèga
abdi jangji moal kabur
tulungan rèsiko dapur

-          uihan deui ti luhur

Dukun

[bimbo]

Bul kukus si dukun lepus

Menyan badag sagorobag

Jampè si gedebul wadul

Anu matak anu mawi

Hulu butak katinggang awi

Puah puah dukun lintuh kasakit matuh

Nyi randa rèk nempo jodo… ka dukun

Mawa menyan saboboko… jang dukun

Jodo nyai moal hèsè.. ceuk dukuk

Teu salah isukna kawin… jeung dukun

Mahasiswa rèk ujian.. dudukun

Teu ngapalkeun da percaya... ka dukun

Di kelas ngawurkeun rampè... ti dukun

Teu lulus mah salah jampè... ceuk dukun

Marènta tulung ka dukun

Geus jadi kabudayaan

Anu pinter kabalinger

Nu teu nyaho kabobodo

Nu gering ripuh ngagibrig

Ceuk dukun ditoèl jurig

Nu muriang dijampean

Ditiah ngagayem menyan

Rèk maèn bal hayang meunang… dudukun

Lamun èlèh malik protes… ka dukun

Lain jampè henteu matih… ceuk dukun

ngan wasitna embung nurut… ka dukun

uihan deui ka  -Nyi randa…