Al-Wahn

Al-Wahn teh Saur mama ajengan Parhan mah

"Nyaah kana dunya, jeung sieun kana paéh"

- anu kaleuleuwihi -

na enya kitu....??

ah kétang asa teu merenah pertanyaan kitu mah..

da ceuk sasauran mama ajengan parhan saterasna téh kieu:

"Loba manusa anu ngabogaan sifat éta (Al-Wahn)"

apan loba téaaa henteu sadaya.. ngan sawaréh

berarti aya ogé manusa anu teu katerap ku éta panyakit téh

enya inget kana kecap Al-Wahn téh,

kuring asa hayang ngadongéngkeun pangalaman sorangan

basa kuring sababara taun kamari, ngalaman jadi pupuhu lembur

Duka ngeus jadi tabéat urang Indonesia duka kumaha atuh

lamun jol téh program ti pamaréntah nu sipatna ngabagikeun dunya,

da pasti atuh paheula-heula

teu sirikna ,,, mun meunang mah hayang ku sorangan,,batur mah ulah.

Jol program raskin (Beras untuk Masyarakat MISKIN) téa

da éta meni jul jol nu mawa karung, nu mawa baskom, nu mawa rantang

ngan euweuh sotéh nu mawa telebug... da euweuh nu bogaeun téa di dieu mah

euweuh nu teu ngaku MISKIN harita mah.. da bakat hayang kaagéhan téa

kajeun teuing manéhan pantes atawa henteuna

teu éra ku budak nu sakola di sakola nu pangmahalna

teu éra ku motor nu ngajéngjréng di imahna

Dina mangsa séjén édarkeun ku kuring téh surat anu kurang leuwih eusina

himboan jang nyarieun Kartu GAKIN (kulawarga Miskin)

anu pungsina jang barobat gratis  kulawarga miskin

mun dina hiji mangsa anggota kulawargana aya nu gering

pon kitu deui teu beda ti Program Raskin atuh

jul jol nu itu ngaku Miskin, nu ieu sarua

lamun sakalina dijawab téh ku kuring, cik atuh,, pan silaing mah teu sangsara sangsara teuing

da éta murubut alesan jang ngayakinkeun kuring yén manéhna téh MISKIN

geus kitu mah bati gogodeg kuring... tepi ka kitu nya boga tatanga téh

Teu jauh béda... pokona mun torojol bantuan

boh ti pamaréntah boh lain.. pasti paheula-heula, sakapeung mah parebut

Jol pakét lebaran, Jol pakét daging qurban, jol pangbagian baju urut

malah sakapeung sok lieur buga bagi téh, komo mun bari kagok mah jumlahna

cékéng matak pipaséaeun ieu mah...

Dina hiji mangsa, pangurus masigit ngaharéwos ka kuring

"Pa'.. ini ada dana kain kafan yang sudah terkumpul dari para jama'ah da warga

minta tolong diumumkan"

teu lila celengkeung wé kuring ngumumkeun dina hiji riungan bapa-bapa

"para sadérék sadaya, saur pangurus, di masigit tos sayogi boéh siap dianggo

seueurna tilu setél, ka saha waè anu badè nyobian ngango tipayun, sumangga dihaturanan.. haratis"

Da éta jep jempling sugan aya nu ngacung hiji wéh

kalahka patuduh-tuduh...

ceuk si itu manèh, ceuk si éta, didinya wé tiheula...

Nyaaa... bukti pan...!!!

Wahn tèh enya ayana

loba diantara urang nu ngabogaan éta panyakit

oOo

Padahal lamun kasauran mama ajengan parhan salajengna deui, kieu...

ieuh.. da anu ngaran-ngaran rezeki mah geus dipincukan ku Gusti téh

geus aya eukeurna séwang-séwangan.. moal pahili

tuluy nu ngaran paéh nya kitu deui..

geus ditangtukeun ku gusti téh waktuna

poéna, jamna, menit jeung detikna

moal bisa dipundurkeun atawa dipajukeun

Taah... mun kitu mah

urang téh kudu nilik kana diri

nempo ka jero diri sorangan

mun seug ceuk rarasaan kaancikan ku éta panyakit,,

geuwat gera ubaran,, bisi kaburu nemen...

- sakitu -