BAGJA
[asmarandana]
cenah baheula mah geulis
ka kuring rea nu hayang
teu sirikna pada ngolo
bru bro mahugi ku barang
ngarajak ulin daratang
malah nepi ka garelut
kuring nu bingung sorangan
bingung ka saha nya milih
sabab euweuh nu sampurna
anu beunghar rada sombong
nu kasep hirupna susah
nu dadag gede ambekna
gagah jangkung mindeng pundung
nu bageur awak congcorang
pipilih meunang nu leuwih
kocepak meunang nu pecak
salaki meunang nu beke
tapi da soleh hatena
cinta geuning teu disangka
batina teh meunang tujuh
da memang turunan reuay
kamari breh dina tipi
kuring teh jadi kagagas
malahan hate nyeredet
waktu mencrong hiji jalma
ditangkep dibarogodan
deudeuh beubeureuh keur buhun
jalma anu beunghar tea
beja manehna korupsi
gedena saanu milyar
nepikeun ka jadi buron
di tewak keur pelesiran
di nagri nu jauh pisan
jalma salembur teh gujrud
kuring teh maca istigpar
geuwat nelepon salaki
bari menta dihampura
sabab kuring sering nyenghor
alatan kawaluratan
pangasilan teu nyukupan
sakapeung murukusunu
tapi salaki teh sabar
milih jodo milih rabi
rejeki diihtiaran
geuning teu bisa dibade
hasilna kuma pangeran
lamun mangsana geus datang
urang kudu muji syukur
da eta kitu takdirna
---
skmi 11082011 - 11091432
Tidak ada komentar:
Posting Komentar