Fatihah

[Kinanti]

Ayat mimiti Alhamdu

Nu panungtung Waladoolliin

Èta surah Al-Fatihah

Sok dibaca siang wengi

Surah pangbuka Al-Qur’an

Kerep harti lèbèr eusi

Ari hartina Alhamdu

Puja puji kanggè Gusti

Jalma teu daya upaya

Ulah sok hayang kapuji

Gusti anu murbeng alam

Kawasa sagala rupi

Atuh ayat nu katilu

Nguni Arrohmani Rohim

Pangèran nu maha welas

Katut anu maha asih

Maha welas ka sadaya

Maha asih kanu Muslim

Ayat kaopat nu luhung

Nya Maliki yaumiddin

Gusti anu mangèranan

Jaga dina poè ahir

Urang jadi pasakitan

Mantena nu janten hakim

Lajeng iyyaka na’budu

Tur Waiyyaka nastain

Ka Gusti wungkul ibadah

Tur mundut pitulung Gusti

Poma tong saukur mènta

Ibadah kudu sing rajin

Mundut jalan ngabulungbung

Jalan Sirotol mustaqim

Nyèta jalan jalma-jalma

Anu satuhu ka Gusti

Anu di paparin nikmat

Sapertos ka para Nabi

Atuh pamundut panungtung

Pamugi urang sing tebih

Ti jalan nu dibenduan

Jalan jalma nu munafik

Komo jalan anu sasab

Jalan na jalma nu kafir

Sakitu anu kahatur

Sumangga mugi katampi

Mugi urang henteu hilap

Ti cangkang dugi ka eusi

Jang padoman hirup urang

Tumut ka Robbul Izzati

-o-